ساوالان باخ هاوالان،دردين آلان چوخدو منيم تك
سئويرم داغ دره وي،بت بره وي، جانلا تنيم تك
قارا آغلي،قاراداغلي،قاراباغلي،وطنيم تك
آي بوتون وارليغي گويچك
ده لي وورغونلارا باش چك

آي طبيعت گوزلي،چوخلو گوزلليكلر گوزو سنسن
هم شيرين يازلي شيرين نازلي باخيشلار سوزو سنسن
نه بيليم بلكه ده دونياده بهشتين اوزو سنسن

كوثرين چشمه سي درياچه وه باغلي
اته گين سبزه لي باغلي
گوللرين خوللو بوداغلي

گوز باخار كن باخيشيملا اوپورم آل ياناغيندان
خضرتك آختاريرام آب حياتي بولاغيندان
وارليغين شهديني بلكه امم او گول دوداغيندان
چكمه رم ال آياغيندان
قوپمارام هئچ قوجاغيندان

اولو سولطان ساوالان داغلار آرا توت اوجا باشين
نئچه ميليون ايلي آيديندي قويوبدور گئري ياشين
آچيق آلنين قيريشيب سا آغاريب باش ايله قاشين
يئنه سايميردي تلاشين
چوخ دوشوب باشلارا داشين

حورمتين وار ائل آرا بيزلره سولطان بابا سنسن
اوز قوچاقلارينا يول گوسترن آغشين خوجا سنسن
دده قورقودلو او سكسكن بير ائلاته آتا سنسن
ديللرين ازبري ائللر آرا سنسن
بوللو درده چارا سنسن

                                          بولوت قاراچورلو"سهند"